އެސްމާ ނުވަތަ ނޭވާ ހިއްލުން ތަހައްމަލު ކުރާ ބަލިމީހުންނަށް ކޮރޯނާވައިރަސްގެ އަސަރު ބޮޑު ވެދާނެ ކަމަށް އެމެރިކާގެ ސެންޓަރސް ފޯ ޑިސީސް ކޮންޓްރޯލް އެންޑް ޕްރިވެންޝަން (ސީޑީސީ) އިން ބުނެފިއެވެ.
ސީޑީސީ އިން ވަނީ މިފަދަ މީހުން އަމަލު ކުރަންޖެހޭ ގޮތުގެ ގައިޑްލައިންއެއް ނެރެފައެވެ. އަދި މީގައި އެކުލެވިގެންވަނީ މިހާތަނަށް ކޮވިޑް-19 އާއި ބެހޭގޮތުން ލިބިފައިވާ މައުލޫމާތުގެ މައްޗަށް ބިނާކޮށް ނެރެފައިވާ ފިޔަވަޅުތަކެކެވެ.
ކޮވިޑް-19 އަކީ އިންސާނާގެ ނޭވާލާ ނިޒާމަށް ޖެހޭ ބައްޔެކެވެ. އޭގެ ތެރޭގައި ނޭފަތް، ކަރު އަދި ފުއްޕާމޭ ހިމެނެއެވެ. ވައިރަސްގެ ސަބަބުން އެސްމާ އެޓޭކެއް ކުރިމަތިވުން އެކަށީގެންވެއެވެ. އަދި ނިއުމޯނިއާ އާއި ނޭވާލާ ނިޒާމުގެ ބަލިތަކާއި ވެސް ކުރިމަތިލާން ޖެހިދާނެއެވެ.
މިވައިރަސް އިން ރައްކާތެރިވެވޭނެ އެންމެ ރަނގަޅު ގޮތަކީ އެވައިރަސް ފެތުރުމުގެ ފުރުސަތު ކުޑަކުރުމެވެ. ނަމަވެސް ނޭވާ ހިއްލުން ހުންނަ ބަލިމީހުން ގިނަ ގިނައިން އަތްދޮވެ، ވީހާވެސް ގިނަ ވަގުތު ގޭގައި މަޑުކުރުމުގެ އިތުރުން އެހެން ބަލިމީހުންނާއި ދުރުގައި އުޅެ، ކެއުން ބުއިމަށް ވަކި ތަށި ފަދަ ތަކެތި ބޭނުންކުރަން ވާނެއެވެ. އަދި ގޭތެރޭ ގިނައިން އަތްލެވޭ ތަންތަން ޑިސްއިންފެކްޓްކޮށް ސާފުކުރަންވެސް ވާނެއެވެ.
މީގެ އިތުރުން ސީޑީސީގެ ގައިޑްލައިންގައި ބުނެފައިވަނީ އެސްމާ ޕޭޝަންޓުންނަށް ދެވިފައިވާ ބޭސް ގަވާއިދުން ކެއުމަށެވެ. އަދި ގޭގައި ގިނަދުވަސް ވަންދެން މަޑުކުރަން ޖެހިއްޖެ ހާލަތުގައި ޑޮކްޓަރާ ވާހަކަދައްކައިގެން ދިގު މުއްދަތަކަށް ބޭސް ނެގުމަށް ވެސް ސީޑީސީ އިން އިރުޝާދު ދެއެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)