ކޮވިޑް-19 ގެ އަލާމާތްތަކުގެ ތެރެއިން އެންމެ ފުރަތަމަ ފެންނާނެ އަލާމާތަކީ ވަސް ނުދުވުމާއި، ރަހަ ނުލުން ކަމަށް ބުނެ ލިޔުންތަކެއް ސޯޝަލް މީޑިއާގައި ފެތުރެން ފެށިއެވެ. މިއީ ހަގީގަތެއް ބާ؟

މިވަގުތާއި ހަމައަށް މިކަން ޔަގީން ކޮށްފައިވާ އެއްވެސް ޕިޔަރ ރިވިއުޑް (ގިނަ ދިރާސާވެރިން ހެކިވާ) ދިރާސާ އެއް ނުވަތަ ކްލިނިކަލް އެއްވެސް ޓެސްޓެއް ނެތެވެ.

ސިއްހީ މާހިރުންނަށް އަދިވެސް ކޮވިޑް-19 ގެ ހުރިހާ އަލާމާތްތައް ޔަގީންވެފައެއް ނުވެއެވެ. ނަމަވެސް ހުން އައުމާ، ކެއްސުން އަދި ނޭވާލާން އުނދަގޫވުން އެއީ އެންމެ އާއްމު އަލާމާތްތައް ކަމަށް ދުނިޔޭގެ ސިއްހަތު ޖަމިއްޔާއިން ވަނީ މީގެ ކުރިން ބުނެފައެވެ.

މީގެ އިތުރުން ވަސް ނުދުވުމާއި ރަހަ ނުލުމަކީ އެލާޖީ އެއްގައި ވެސް ފެންނަ އަލާމާތެކެވެ. އަދި ސިނގިރޭޓު ބުއިން ފަދަ ކަންކަމުންވެސް މިހެން ވުން އެކަށީގެންވެއެވެ.

ކޮވިޑް-19 ގެ އަލާމާތްތަކުގެ ތެރެއިން އެންމެ ފުރަތަމަ ފެންނާނެ އަލާމާތަކީ ވަސް ނުދުވުމާއި، ރަހަ ނުލުން ކަމަށް ބުނެ ފެތުރޭ ލިޔުންތަކުން މިމައުލޫމާތު ނަގައިފައިވަނީ އެމެރިކަން އެކަޑަމީ އޮފް އޮޓޮލަރިންގޮލޮޖީ-ހެޑް އެންޑް ނެކް ސަރޖަރީ އިން ނެރެފައިވާ ބަޔާނަކުންނެވެ. 

މިބަޔާނުގައި ބުނެފައިވަނީ މިއަލާމާތްތައް ފެނިއްޖެ ހިނދެއްގައި އެއީ ކޮވިޑް-19 ގެ ސަބަބުން ފެންނަ އަލާމާތްތަކަކަށް ވެދާނެ ކަމަށް ޑޮކްޓަރުން ވިސްނާ، އެ ބަލިމީހަކު އެކަހެރިކޮށް ޓެސްޓުކުރުމަށް އިސްކަމެއް ދޭން ޖެހޭނެ ކަމަށެވެ.

އެ މީހަކު އަމިއްލައަށް ކޮވިޑް-19 އަށް ޕޮޒޓިވްތޯ ދެނެގަތުމަކީ ކުރެވޭނެ ކަމެއް ނޫނެވެ. އެހެން ކަމުން އެންމެ ރަނގަޅު ގޮތަކީ އެޗްޕީއޭ އަދި ދުނިޔޭގެ ސިއްހަތު ޖަމިއްޔާގެ އެންގުން ތަކަށް ސަމާލުކަން ދިނުމަށެވެ.

މީގެ އިތުރުން ފަރުދީ ޒިންމާ އަދާކޮށް މީހުން އެއްވެ އުޅޭ ތަންތަނަށް ނުދިއުން މިދުވަސްވަރު މުހިންމެވެ. އަދި ނޭވާލާން އުނދަގޫވެ މޭގައި ރިއްސުން ފަދަ އެމަޖެންސީ އަލާމާތެއް ފެނިއްޖެ ނަމަ ވަގުތުން ޑޮކްޓަރެއްގެ ލަފާ ހޯދުމަށް ވިސްނަންވާނެއެވެ.

ގުޅުންހުރި ލިޔުންތައް

ފަހުގެ ލިޔުންތައް