ލަންޑަންގެ ހޮސްޕިޓަލްއެއްގައި ވިހޭ ކުއްޖަކު ކޮރޯނާވައިރަސްއަށް ޕޮސިޓިވް ވެއްޖެއެވެ. މުޅިދުނިޔެއިން ކޮރޯނާވައިރަސް ޖެހިފައިވާ އެންމެ ހަގު ކުއްޖާކަމަށް ބުނެފައިވާ މި ކުއްޖާގެ މަންމަ ވަނީ މީގެ ދުވަސްކޮޅެއް ކުރިން ނިއުމޯނިއާ ހުރިކަމަށް ޝައްކު ކުރެވުމުން ލަންޑަންގެ ހޮސްޕިޓަލަކަށް ގެންގޮސްފައެވެ.
ހޮސްޕިޓަލްއަށް ގެންދިއުމުގެ ކުރިން މަންމައަށް ވައިރަސް ޖެހިފައިވާކަމެއް ނޭނގެއެވެ. މަންމައަށް ވައިރަސް ޖެހިފައިވާކަން އެނގިފައިވަނީ ނޯރތު މިޑިލްސެކްސް ހޮސްޕިޓަލްގައި ވިހެއުމަށްފަހު ޓެސްޓްތައް ހެދުމުންނެވެ. އަދި ވިހެއުމުން ދަރިފުޅުގެވެސް ވަނީ ޓެސްޓްތައް ހަދާފައެވެ.
ކުއްޖާއަށް ވައިރަސް ޖެހިފައިވަނީ ބަނޑުގައި އޮއްވާ ކަމެއް ނުވަތަ ވިހެއުމުގެ ތެރޭގައިކަން ޔަގީން ނުވާކަމަށް ވަނީ ބުނެފައެވެ.
ހޮސްޕިޓަލަށް ގެންދިއުމަށްފަހު މަންމައަށް އަދި ދަރިފުޅަށްވެސް ވައިރަސް ޖެހިފައިވާކަން ޔަގީންވުމުން، ވަކި ހޮސްޕިޓަލްތަކުގައި ފަރުވާދިނުމުގެ ގޮތުން ބައިތިއްބާފައިވާކަމުގެ މައުލޫމާތުވަނީ ލިބިފައެވެ.
މިކަމާ ގުޅޭގޮތުން ނޯރތު މިޑިލްސެކްސް ހޮސްޕިޓަލްއިން ބުނެފައިވަނީ 2 ޕޭޝަންޓުން ވަނީ އެ ހޮސްޕިޓަލުގައި ވައިރަސްއަށް ޓެސްޓެ ކުރުމަށްފަހު ޕޮސިޓިވް ވެފައިކަމަށާއި، އެއް ޕޭޝަންޓް މިހާރުވަނީ ސްޕެޝަލިސްޓް ސެންޓާއަކަށް ބަދަލު ކޮށްފައިކަމަށެވެ. އަދި އަނެއް ޕޭޝަންޓްއަށް މި ހޮސްޕިޓަލުގެ އައިސޮލޭޝަން ރޫމްއެއްގައި ފަރުވާ ދެމުންދާކަމަށް ބުނެފައިވެއެވެ.
ހަމައެއާއެކު، ހޮސްޕިޓަލްއަށް އެންމެ މުހިންމު ކަމަކީ ސްޓާފުންނާއި ޕޭޝަންޓުންގެ ރައްކާތެރިކަން ކަމަށާއި، ޕަބްލިކް ހެލްތު އިންގްލެންޑްގެ ލަފާގެ މަތިން ޕޭޝަންޓުންނަށް ފަރުވާދެމުންދާ ހިސާބުތައް ކޮންމެ ދުވަހަކު ރީތިކޮށް ސާފު ކުރެވޭކަމަށް ބުނެފައިވެއެވެ.
އަދި އެއްވެސް ސްޓާފެއް ޕޭޝަންޓްއަކާ ކޮންޓެކްޓްވެފައިވާނަމަ ސެލްފް އައިސޮލޭޓްވުމަށް އަންގާފައިވާކަމަށްވެސް ބުނެފައިވެއެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)