އެމެރިކާ، އިނގިރޭސިވިލާތު އަދި އެފްރިކާގެ ސިއްހީ ހިދުމަތްތެރިންގެ ޓީމެއް ބުރާސަފަތި ދުވަހު ރާއްޖެ އަންނާނެ ކަމަށް ޓޫރިޒަމް މިނިސްޓަރ އަލީ ވަހީދު ވިދާޅުވެއްޖެއެވެ.
މިނިސްޓަރ ވިދާޅުވެފައިވަނީ އެޓީމުގައި ޑޮކްޓަރުންނާއި ނަރުހުން އަދި އިތުރު ހިދުމަތްތެރިންވެސް ހިމެނޭނެ ކަމަށެވެ.
"އަޅުގަނޑުމެން މިދެކޭ ގޮތުގައި ކުރިއަށް މިއޮތް ހަފްތާތައް ވާނީ މިކަމުގައި އެންމެ އެކަށީގެންވާ ގޮތެއްގައި ވަރުގަދަ މަސައްކަތްތަކެއް ކުރަން ޖެހޭ ދުވަސްތަކަކަށް" މިނިސްޓަރ ފާހަގަކުރެއްވިއެވެ.
މީގެ އިތުރުން މިނިސްޓަރ ވިދާޅުވެފައިވަނީ މިޓީމު ރާއްޖޭގައި ހުންނާނީ 1 މަސް ދުވަސް ވަންދެން ކަމާއި މިޓީމަކީ ޓޫރިޒަމް މިނިސްޓްރީން ޓާސްކްފޯސްއަށް ހަދިޔާކޮށްފައިވާ ޓީމެއް ކަމަށެވެ.
ރާއްޖޭގައި ހުންނަ ވިލިވަރު ފެސިލިޓީގެ ފޭސް ދެއެއްގެ ވާހަކަދައްކަވަމުން މިނިސްޓަރ ވިދާޅުވެފައިވަނީ ރައީސް ސޯލިހްގެ ނިންވުމާއެކީ ވިލިވަރުގެ ފޭސް ދެއެއްގެ މަސައްކަތް ނިމުމުން 100 އެނދަށް ވުރެ ގިނަ އެނދުގެ ފެސިލިޓީއެއް ގާއިމުވެގެން ދާނެ ކަމަށެވެ.
ހަމަމިއާއެކު ރާއްޖޭގައި ތިންވަނަ ކަރަންޓީން ފެސިލިޓީއެއް ގާއިމް ކުރުމުގެ ގޮތުން އއ. ވެލިދޫ އައިލެންޑް ރިސޯޓު ބޭނުން ކުރެވޭނެ ކަމަށްވެސް މިނިސްޓަރ ވިދާޅުވިއެވެ.
ރާއްޖޭގައި މިހާތަނަށް 10 މީހަކު ވަނީ ކޮވިޑް-19 އަށް ޕޮޒިޓިވް ވެފައެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)