ވަން އެންޑް އޮންލީ ރީތި ރަށް ރިސޯޓިން ކޮވިޑް-19 އަށް ޝައްކު ކުރެވިގެން ޓެސްޓު ކުރި މީހާގެ ނަތީޖާ ނެގަޓިވް ވެއްޖެ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ހާމަކޮށްފިއެވެ.

އެޗްޕީއޭއިން ކުރި ޓްވީޓެއްގައި ބުނެފައިވަނީ އެމީހާ ނެގަޓިވް ވުމާއި ގުޅިގެން އަދި އެއާއި ވިދިގެން ކުރެވުނު ކޮންޓެކްޓް ޓްރޭސިންގް ގެ މަސައްކަތް ނިމުމުން މިހާރު އެރަށަށް އަރާ ފޭބުމުގެ އެއްވެސް ހުރަހެއް ނެތް ކަމަށެވެ.

#ކޯވިޑް19އަށް ޝައްކުކުރެވޭ އަލާމާތްތައް ހުރެގެން ވަން އެންޑް އޮންލީ ރީތިރަށް ރިސޯޓުން ސާމްޕަލް ނަގާ ޓެސްޓްކުރި މީހާ ވަނީ #ކޯވިޑް19އަށް ނެގަޓިވް ވެފައި.

— HPA Maldives (@HPA_MV) March 11, 2020

ވަން އެންޑް އޮންލީ ރީތި ރަށް ރިސޯޓުން ބިދޭސީއެއްގެ ގައިން ކޮވިޑް-19 ގެ އަލާމާތްތައް ފެނުމުން ފަރުކޮޅުފުށީ ފެސިލިޓީއަށް ގެންދެވިފައިވާކަމަށް އެޗްޕީއޭ އިން އިއްޔެ ވަނީ ރިޕޯޓުކޮށްފައެވެ.

މިއާއެކު ރާއްޖޭގައި މިވަގުތު ވިލިވަރުގައި 9 ފަރާތެއް އައިސޮލޭޓް ކުރެވިފައިވާ އިރު ފަރުކޮޅުފުށީގައި 15 މީހެއް ވަނީ އެކަހެރި ކުރެވިފައެވެ.

ދުނިޔޭގެ ސިއްހަތު ޖަމިއްޔާއިން ދާދި ފަހުން ބުނެފައިވަނީ ނޮވެލް ކޮރޯނާވައިރަސް މުޅި ދުނިޔެއަށް ފެތުރުމުގެ ފުރަސަތު ވަރަށް ބޮޑު ކަމަށެވެ.

މިހާތަނަށް 119 ގައުމަކުން މިވައިރަސް ފެނިފައިވާ އިރު 119،225 މީހުން ޕޮޒިޓިވް ވެ 4،299 މީހުން ވަނީ މަރުވެފައެވެ. 

ގުޅުންހުރި ލިޔުންތައް

ފަހުގެ ލިޔުންތައް