ކޮރޯނާ ވައިރަސްއަށް ޕޮޒިޓިވްވެފައިވާ ދުވަސްވީ ބިދޭސީއަކު އިތުރަށް މޮނީޓާ ކުރަން ޖެހޭތީ ދަރުމަވަންތަ ހޮސްޕިޓަލަށް ބަދަލު ކުރުމަށް ނިންމައިފި އެވެ.
ދަރުބާރުގޭގައި އިއްޔެރޭ ކުރިއަށްދިޔަ ޕްރެސް ކޮންފަރެންސްގައި ރައީސް އޮފީހުގެ އަންޑަ ސެކްރެޓަރީ މަބްރޫކް އަބްދުލް އަޒީޒް ވިދާޅުވީ ބަތަލާ އައިލެންޑުން ވައިރަހަށް ޕޮޒިޓިވްވި އުމުރުން 70 އަހަރުގެ ފިރިހެން މީހާއާ އެކު އޭނާގެ އަންހެނުން ވެސް ދަރުމަވަންތަ ހޮސްޕިޓަލަށް ބަދަލު ކުރާނެ ކަމަށެވެ.
އަދި އެމީހާ ދަރުމަވަންތަ ހޮސްޕިޓަލްގެ ޑީއެޗް11 ފެސިލިޓީއަށް ބަދަލުކުރަނީ އޭނާ އިތުރަށް މޮނީޓާކުރުމަށް ޖެހޭ ކަމަށް މެޑިކަލް ޓީމަށް ފެންނާތީ އެވެ.
އިތުރަށް މޮނީޓާ ކުރަނީ އެމީހާއަކީ ދުވަސްވީ މީހަކަށްވާތީ ހައިރިސްކު ކެޓަގެރީގެ މީހަކަށްވާތީ އެވެ. އޭނާގެ ހާލު ގޯސް ނޫން ކަން ވެސް ހާމަކުރި އެވެ.
އައިޖީއެމްއެޗުގެ ޑޮކްޓަރު މުއާޒް މޫސާ ވިދާޅުވީ ބަލި މީހާ އަށް ހޮސްޕިޓަލުގައި ފަރުވާ ދޭނީ އައިޒޮލޭޝަނުގައި ކަމަށާއި އެހެންވެ ހޮސްޕިޓަލްގެ ސްޓާފުންނާއި އާއްމުންނަށް އެއްވެސް ނުރައްކަލެއް ކުރިމަތިނުވާނެ ކަމަށެވެ. އަދި އެމީހާ ބޭނުންކުރާނީ ވަކި އެންޓްރަންސްއެއް އަދި ވަކި ލިފްޓެއް ކަމަށްވެސް ޑރ. މުއާޒް ވިދާޅުވިއެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)