ދުންފަތުގެ އިސްތިއުމާލްކުރާ މީހުންނަށް ނުރައްކާތެރި ކޮރޯނާވައިރަސް (ކޮވިޑް-19) ޖެހުމުގެ ފުރުސަތު ބޮޑުކަމަށް ހެލްތް ޕްރޮޓެކްޝަން އެޖެންސީ އެޗްޕީއޭއިން ބުނެފި އެވެ.

ނޮވެލް ކޮރޯނާވައިރަސް ޖެހުމުގެ ފުރުސަތު ބޮޑު މީހުންގެ ގޮތުގައި ދުނިޔޭގެ ސިއްހަތު ޖަމިއްޔާއިން ބުނެފައިވަނީ އުމުރުން ދުވަސްވީ މީހުންނާއި ކުޑަކުދިންގެ އިތުރުން ބޮޑެތި ބަލިތައް ތަހައްމަލް ކުރަމުންދާ މީހުންނެވެ. އޭގެތެރޭގައި ކެންސަރާއި، ނިއުމޯނިއާ އަދި ހިތުގެ ބަލި ހުންނަ މީހުންނަށް ކޮރޯނާވައިރަސް ޖެހުން އަދި ހާލަތު އިތުރަށް ގޯސްވުމުގެ ފުރުސަތު އޮވެއެވެ.

އެޗްޕީއޭއިން ބުނިގޮތުގައި ދުންފަތުގެ އިސްތިއުމާލްކުރުމަކީ އެކަމުގެ ސަބަބުން ހިތުގެ ބަލިތައް ފަދަ ސިއްހީ މައްސަލަތައް ހުންނަ މީހުންގެ ސިއްހީ ހާލަތު އިތުރަށް ގޯސްކުރުވާ އަމަލެކެވެ. އަދި މިފަދަ ސިއްހީ މައްސަލަތައް ހުންނަ މީހުންނަށް ކޮރޯނާވައިރަސް ޖެހުމުގެ އަދި ބަލިން ކުރާ އަސަރު ބޮޑުވުމުގެ ފުރުސަތު އޮވެއެވެ. 

އެހެންކަމުން ދުންފަތުގެ އިސްތިއުމާލުކުރުމަކީ ކޮވިޑް-19 އިން ރައްކާތެރިކޮށްދޭނެ ކަމެއް ނޫންކަމަށް އެޗްޕީއޭއިން ވަނީ ބުނެފަ އެވެ.

Does smoking 🚬 put you at a higher risk for #Covid_19 ? pic.twitter.com/M0ejYSk9q2

— HPA Maldives (@HPA_MV) March 5, 2020

ރާއްޖެގެ އާބާދީގެ ބޮޑު އިންސައްތައެއް ހިއްސާވަނީ ދުންފަތުގެ އިސްތިއުމާލްކުރާ މީހުންގެ ގޮތުގައެވެ. ދުންފަތުގެ އިސްތިއުމާލްކުރުމަކީ އެކަމުގެ ސަބަބުން ފުއްޕާމޭގެ ކެންސަރާއި، ހިތުގެ ބަލިތަކާއި، ސްޓްރޯކް ޖެހުން، އަނގައިގެ ކެންސަރު، ރަހިމުގެ ދޮރަށްޖެހޭ ކެންސަރު ޖެހުމުގެ ފުރުސަތު ބޮޑުކޮށްދޭ ކަމެކެވެ. އަދި އެހެންމެ ދުންފަތުގެ އިސްތިއުމާލްކުރުމަކީ މީހާގެ ދިފާއީ ނިޒާމު ބަލިކަށިކޮށްލާ އިތުރު ބަލިތައް ޖެހުމަށް މަގުފަހިކުރުވާ ކަމެކެވެ.

އަދި ދުންފަތުގެ އިސްތިއުމާލުކުރުމުގެ ސަބަބުން އަހަރެއްގެ މައްޗަށް ދުނިޔެއިން 8 ބިލިޔަން މީހުން މަރުވެއެވެ.

ގުޅުންހުރި ލިޔުންތައް

ފަހުގެ ލިޔުންތައް