މި ދުވަސްވަރު ދުނިޔޭގެ އެކިކަންކޮޅުތަކުގައި ފެތުރެމުންދަ ނުރައްކާތެރި ކޮރޯނާވައިރަހާއި ގުޅިގެން ޗައިނާގެ އިތުރުން މި ވައިރަސް ފެތުރެމުންދާ އީރާން އަދި ދެކުނުކޮރެއާއިން ވެސް އަންނަ ދިވެހިން 14 ދުވަހުގެ މުއްދަތަކަށް ކަރަންޓީނުކުރަން އެޗްޕީއޭއިން ނިންމައިފި އެވެ.

ކޮވިޑް-19 އާއި ގުޅިގެން ސަރުކާރުން އިތުރަށް އަޅަން ނިންމައި ނެރުނު ބަޔާނުގައި ވާގޮތުން މިމަހުގެ 26 ވަނަ ދުވަހުން ފެށިގެން އީރާން އަދި ދެކުނު ކޮރެއާގެ (ބުސަން، ޖައިޔޮންގްބުކް، ދައެގޫ، ސިއުލް، ޖައިޔޮންގްގީ އަދި ޖައިޔޮންގްނަމް) އިން ވައިގެ މަގުން ދަތުރުކުރާ ފަސިންޖަރުންނާއި ކްރޫއިން އަދި ވޭތުވެދިޔަ 14 ދުވަހުގެ ތެރޭގައި މި އީރާން އަށާއި ދެކުނުކޮރެއާގެ ފާހަގަކޮށްފައިވާ ޕްރޮވިންސްތަކަށް ޓްރާންސިޓްކޮށް ނުވަތަ ޒިޔާރަތްކޮށްފައިވާ މީހުން ރާއްޖެއައުން ވަނީ މެދުކަނޑާލާފަ އެވެ. 

ނަމަވެސް އެ ޤައުމުތަކުން ރާއްޖެ އަންނަ ދިވެހިންނަށް ރާއްޖެ އެތެރެވެވޭނެ ކަމަށާއި އެހެންނަމަވެސް 14 ދުވަހު ކަރަންޓީނުވަން ޖެހޭނެކަމަށް މި ބަޔާނުގައި  ބުނެފައި ވެއެވެ. 

ރާއްޖޭގެ ސަރުކާރުން މިދިޔަ ބުދަދުވަހު ވަނީ ރާއްޖެއަށް ކްރޫޒްލައިނާރސް އައުންވެސް މެދުކަނޑާލާފައެވެ.

އެޗްޕީއޭއިން ވަނީ ކޮވިޑް-19 އަލަށް ފެނުނު ޤައުމުތަކަށް ކޮންމެހެން ދާންޖެހިގެން ނޫނީ ދަތުރުނުކުރުމަށް އިލްތިމާސްކޮށްފަ އެވެ. އޭގެތެރޭގައި ހާއްސަކޮށް ބަލިމީހުންނާއި އުމުރުން ދުވަސްވީ މީހުން ހިމެނެ އެވެ.

މީގެއިތުރުން އެޗްޕީއޭއިން ވަނީ ރާއްޖެއިން ބޭރަށް ދަތުރުކޮށްއުޅުމުގައި ދިވެހިން ސަމާލުކަން ދޭންވީ ކަންކަމުގެ އިރުޝާދުވެސް އާންމު ކޮށްފަ އެވެ. އޭގެތެރޭގައި ހިމެނެނީ:

• ދަތުރުކުރާ ޤައުމެއްގައި ބަލި ފެތުރޭ މިންވަރާއި ސަރަހައްދުތައް ދެނެގަތުން
• އެ ޤައުމެއްގެ ސަރުކާރުން، ރައްކަތެރިވުމަށް އެޅުމަށް އަންގާފައިވާ ފިޔަވަޅުތައް ދެނެގަނެ، އެކަންކަމަށް އަމަލުކުރުން
• ރޯގާޖެހި ހުން އައިސްފައި ތިބޭ މީހުންނާއި ކައިރިން ނޫޅުން
• ސައިބޯނި ލައިގެން ގިނަގިނައިން އަތްދޮވުން / ސައިބޯނި ނެތްނަމަ ހޭންޑް ސެނިޓައިޒާރ ބޭނުންކުރުން
• ދަތުރުކުރުމަށްފަހު އެނބުރި އައިސް ރޯގާޖެހި، ކެންސާ ހުން އައުން ފަދަ އަލާމާތެއް ފެނިއްޖެނަމަ ގޭގައި މަޑުކުރުން އަދި އިތުރަށް ގޯސްވާނަމަ ޑޮކްޓަރެއްގެ ލަފާ ހޯދުން

ގުޅުންހުރި ލިޔުންތައް

ފަހުގެ ލިޔުންތައް