ޗައިނާގެ ވޫހާންސިޓީގައި ހުރި ހޮސްޕިޓަލްތަކުގެ ތެރެއިން އެންމެ ހޮސްޕިޓަލަކުން އެކަނިވެސް 40 މުވައްޒަފުން ޖެނުއަރީ މަހު ކޮރޯނާވައިރަހަށް ޕޮޒިޓިވް ވެފައިވާކަމަށް އާ ދިރާސާ އަކުން ދައްކައިފިއެވެ. 

ކޮރޯނާވައިރަސްއަށް ޕޮޒިޓިވްވެފައިވަނީ ވޫހާންގެ ޒޮންގްނަން ހޮސްޕިޓަލަށް ނިސްބަތްވާ 40 މުވައްޒަފުންނެވެ. ޖަރނަލް އޮފް ތަ އެމެރިކަން މެޑިކަލް އެސޯސިޔޭޝަން (ޖާމާ) ގައި މި ހޮސްޕިޓަލުން ޝާއިއުކޮށްފައިވާ ދިރާސާގައި ވާގޮތުން އެ ހޮސްޕިޓަލްގެ ސާޖިކަލް ޑިޕާޓްމެންޓްގައި އެޑްމިޓްކޮށްފައިވާ އެންމެ ބަލިމީހެއްގެ ސަބަބުން ޖުމްލަ 10 މުވައްޒަފުންނަށް ވަނީ ކޮރޯނާވައިރަސްގެ އަސަރުކޮށްފަ އެވެ. 

މީގެއިތުރުން އެހެނިހެން ބަލިތަކުގެ ސަބަބުން އެ ހޮސްޕިޓަލުގައި އެޑްމިޓްކުރި 17 މީހަކަށްވަނީ ހޮސްޕިޓަލްގެ ތެރެއިން ކޮރޯނާވައިރަސް ޖެހިފަ އެވެ. އެއާއެކު ޖެނުއަރީމަހު އެކަނިވެސް އެހޮސްޕިޓަލުން ކޮރޯނާވައިރަހަށް ޕޮޒިޓިވްވި މީހުންގެ އަދަދުވަނީ 138އަށް އަރާފަ އެވެ.

މި ދިރާސާ އާއްމުކޮށްފައިވަނީ ކޮރޯނާވައިރަސް އެންމެ ފުރަތަމަ ދެނެގަނެ އާއްމުންގެ ސަމާލުކަމަށް އެކަން ގެންނަން މަސައްކަތްކުރި ޗައިނާގެ ޑޮކްޓަރު މަރުވިތާ މަދު ގަޑިއިރުތަކެއްގެ ތެރޭގައެވެ.

ކޮރޯނާވައިރަސް ފުރަތަމަ ދެނެގަނެ އެކަން އާއްމުންގެ ސަމާލުކަމަށް ގެންނަން 34 އަހަރުގެ ލީ ވެންލިއަންގ މަސައްކަތްކުރުމުން ޗައިނާއިން އެންމެ ފުރަތަމަ ވަނީ އޭނާގެ ބަސް ދޮގުކޮށް ނުހައްގު އަދަބު ދީފައެވެ. މި ނުރައްކާތެރި ވައިރަހުގައި މަރުވި މީހުންގެ އަދަދު މިހާރުވަނީ 724އަށް އަރާފައެވެ.

ޖާމާގައި ޝާއިއުކޮށްފައި ވާގޮތުން ކޮރޯނާ ވައިރަހަށް ޕޮޒިޓިވްވި 40 މުވައްޒަފުންގެ ތެރެއިން 31 މީހުންނަކީ އެ ހޮސްޕިޓަލުގެ އާއްމު ބަލިތަކަށް ހާއްސަ ވޯޑުގައި މަސައްކަތް ކުރާ މީހުންނެވެ. އަދި ހަތް މީހަކު އެމަރޖެންސީ ޑިޕާޓުމެންޓުގައި މަސައްކަތްކުރާއިރު ބާކީތިބި ދެ މީހުން މަސައްކަތްކުރަނީ އައިސީޔޫގައި ކަމަށް ވަނީ ބުނެފަ އެވެ.

ގުޅުންހުރި ލިޔުންތައް

ފަހުގެ ލިޔުންތައް