ހިމަބިހިޖެހިފައިވާކަމަށް ޝައްކުކުރެވުނު ތިންވަނަ ކުއްޖާ އެ ބައްޔަށް ނެގެޓިވް ވެފައިވާ ކަމަށް ހެލްތް މިނިސްޓްރީއިން ބުނެފި އެވެ.
ރާއްޖެއިން ހިމަބިހި ނައްތާލެވިފައިވާކަން އިއުލާންކުރިތާ ގާތްގަނޑަކަށް ތިން އަހަރުފަހުން މި ބަލި ރާއްޖެއިން ފެނިފައިވަނީ ފާއިތުވި ހަފްތާގެ ތެރޭގައެވެ. އަދި ހިމަބިއްސަށް ދެ މީހަކު ވަނީ މިހާތަނަށް ޕޮޒިޓިވްވެސް ވެފައެވެ.
ހެލްތް މިނިސްޓްރީއިން ކުރި ޓްވީޓްގައި ބުނެފައިވާގޮތުން ހިމަބިއްސަށް ނެގެޓިވްވި މި ކުއްޖާއަކީ ވެކްސިން ޖަހާފައިވާ ކުއްޖެކެވެ. ހިމަބިއްސަށް މިހާތަނަށް 3 އަހަރުގެ ކުއްޖަކާއި 30 އަހަރުގެ މީހަކު ޕޮސިޓިވްވެފައިވާކަމަށް ހެލްތު މިނިސްޓްރީން ވަނީ ކަށަވަރުކޮށްދީފައެވެ.
ހިމަބިހި ރާއްޖެއިން ފެނުމާއި ގުޅިގެން ހެލްތް މިނިސްޓްރީއިން މިއަދު ބޭއްވި ނޫސްވެރިންގެ ބައްދަލުވުމުގައި ހެލްތް މިނިސްޓަރ އަބްދުﷲ އަމީންވަނީ ހިމަބިއްސަށް އެންމެ މީހަކު ޕޮޒިޓިވް ވިޔަސް އެއީ އައުޓްބްރޭކްއެއްގެ ގޮތުގައި ބަލަންޖެހޭނެ ކަމަށް ބުނެފައެވެ. އަދި މިއާއެކު ރަސްމީކޮށް ސަރުކާރުން ވަނީ ރާއްޖޭގައި ހިމަބިހި ފެތުރެމުންދާކަން އިއުލާންކޮށްފައެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)