މިއަހަރުގެ ނޮވެމްބަރު މަހު ޖުމްލަ 112 މީހުން އިންފުލުއެންޒާއަށް ޕޮޒިޓިވް ވެފައިވާކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ ޑެންގީ އަދި އިންފުލުއެންޒާ ހަފްތާ ރިޕޯޓުން ދައްކައިފި އެވެ.
އެޗްޕީއޭގެ ރިޕޯޓުގައި ބުނާގޮތުން މިއަހަރު އެންމެ ގިނަ އަދަދެއްގެ މީހުން އިންފުލުއެންޒާއަށް ޕޮޒިޓިވް ވެފައިވަނީ ހުސްވި ނޮވެމްބަރު މަހުގައެވެ. އެގޮތުން ނޮވެމްބަރު މަހު ޖުމްލަ 287 މީހަކު އިންފުލުއެންޒާއަށް ޓެސްޓު ކޮށްފައިވާއިރު، އެތަނުން 112 މީހުން އިންފުލުއެންޒާއަށް ޕޮޒިޓިވް ވެފައިވާ ކަމަށް ވަނީ ބުނެފައެވެ.
ހަފްތާ ރިޕޯޓުގައި އިތުރަށް ބުނެފައިވާގޮތުން މިއަހަރުގެ މިހާތަނަށް އެންމެ ގިނަ މީހުން އިންފުލުއެންޒާއަށް ޕޮޒިޓިވް ވެފައިވަނީ މާލޭގެ އިތުރުން ރ. އަތޮޅާއި ކ. އަތޮޅުންނެވެ.
އެޗްޕީއޭގެ ރިޕޯޓުގައި ބުނެފައިވާ ގޮތުން މިއަހަރުގެ މިހާތަނަށް ޑެންގީގެ ޖުމްލަ 4817 ކޭސްއެއް ވަނީ ރިޕޯޓު ކޮށްފައެވެ. އަދި އެހެން އަހަރުތަކުގެ މިދުވަސްވަރާއި އަޅާބަލާއިރު، މިއަހަރު ޑެންގީ ޖެހިގެން ރިޕޯޓު ކުރާ އަދަދ އިތުރުވެފައިވާ ކަމަށެވެ. އެހެންނަމަވެސް އޮކްޓޯބަރު މަހާއި އަޅާބަލާއި ނޮވެމްބަރު މަހު ޑެންގީ ކޭސް ރިޕޯޓުކޮށްފައިވާ އަދަދު މަދުކަން އެޗްޕީއޭއިން ވަނީ ފާހަގަކޮށްފަ އެވެ.
އޮކްޓޯބަރު އަދި ނޮވެމްބަރުމަހު ޑެންގީ ޖެހިގެން އެންމެ ގިނަ އަދަދަކަށް ރިޕޯޓުކޮށްފައިވަނީ ނ، ބ، ކ، ދ މި އަތޮޅުތަކުގެ އިތުރުން ހުޅުމާލެއިންނެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)