ހާއްސަ އެހީއަށް ބެނުންވާ މީހުންނަށް ރަށްރަށުގައި ތިބެގެން ފަރުވާ ލިބޭނެ އިންތިޒާމެއް މިދަނީ ހަމަޖައްސަމުން: ނައިބު ރައީސް
ރަށްރަށުގައި ދިރިއުޅޭ ނުކުޅެދުންތެރިކަން ހުންނަ މީހުންނަށް އެ ރަށްރަށުގައި ތިބެގެން ފަރުވާ ލިބޭނެ އިންތިޒާމެއް ހަމަޖެއްސުމަށް ސަރުކާރުން މަސައްކަތްކުރަމުން ދާ ކަމަށް ރައީސުލްޖުމްހޫރިއްޔާގެ ނައިބު ފައިސަލް ނަސީމް ވިދާޅުވެއްޖެއެވެ.
"ރިވެލި" މައުރަޒު ހުޅުވުމަށް ބޭއްވި ރަސްމިއްޔާތުގައި މިއަދު ވާހަކަފުޅު ދައްކަވަމުން އެ މަނިކުފަނު ވިދާޅުވީ ހާއްސަ އެހީއަށް ބޭނުންވާ ހައްޤުތަކާއި، ރަނގަޅު ފަރުވާ ހޯދައިދިނުމަށް އިތުރަށް މަސައްކަތްކުރަން ޖެހޭ ކަމަށެވެ. އަދި އެކަމަށްޓަކައި މިފަދަ މީހުންނަށް ރަށްރަށުން ފަރުވާ ލިބޭނެ އިންތިޒާމް ހަމަޖެއްސުމަށް ސަރުކާރުން މަސައްކަތް ކުރަމުންދާ ކަމަށްވެސް އެމަނިކުފާނު ވަނީ ވިދާޅުވެފަ އެވެ.
އިތުރަށް ފައިސަލް ނަސީމް ވިދާޅުވީ ހާއްސަ އެހީއަށް ބޭނުންވާ ތައުލީމާއި ތަމްރީން ފޯރުކޮށްދިނުމަށް ސަރުކާރުން އިތުރަށް ހަރުދަނާ ފިޔަވަޅުތަކެއް އަޅަން ޖެހޭ ކަމަށެވެ. މީގެއިތުރުން އެ މަނިކުފާނު ވަނީ މިފަދަ މީހުންނަށް ރަނގަޅު ހިދުމަތްތަކެއް ފޯރުކޮށްދިނުމަށް ސަރުކާރުގެ އިދާރާތަކާއި ކުންފުނިތަކަށް ގޮވާލައްވާފަ އެވެ.
"ރިވެލި" މައުރަޒަކީ ހާއްސަ އެހީއަށް ބޭނުންވާ ހުނަރު ދައްކާލުމަށްޓަކައި ކޮންމެ އަހަރަކުވެސް ބާއްވާ މައުރަޒެކެވެ. މިއަހަރުގެ މި މައުރަޒު ނެޝަނަލް އާރޓް ގެލެރީގައި ފައްޓާފައިވާއިރު، މައުރަޒުގައި ޕޭސްޓްރީ، އަތްތެރި މަސައްކަތް، ކުރެހުން އަދި ފެޝަން އެންޑް ޑިޒައިނިން މި ހަތަރު ކެޓަގަރީގެ މަސައްކަތްތައް ފެނިގެންދާނެއެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)