ބަންގްލަދޭޝްގައި ހަލުވި ސްޕީޑެއްގައި ޑެންގީ ފެތުރެމުންދާކަމަށް ވޯލްޑް ހެލްތް އޮގަނައިޒޭޝަން (ޑަބްލިއު.އެޗް.އޯ) އިން ބުނެފި އެވެ.

އެގޮތުން ޑަބްލިއު.އެޗް.އޯ ކޮށްފައިވާ ޓްވީޓެއްގައި ބުނެފައިވަނީ މި ހިނގާ ދެހާހުގެ އަހަރުތަކުގެ ތެރެއިންވެސް މިއަހަރު ރެކޯޑު އަދަދަކަށް ބަންގްލަދޭޝްގައި ޑެންގީ ފެތުރެން ފަށާފައިވާ ކަމަށެވެ.

މީގެއިތުރުން އިންޑިޔާގެ ކައިރީގައިވާ ގިނަ ޤައުމުތަކެއްގައި ޑެންގީ ފެތުރެމުންޑާ ކަމަށްވެސް ޑަބްލިޔު.އެޗް.އޯގެ ޓްވީޓްގައި ވަނީ ބުނެފަ އެވެ. އަދ މި އަހަރުގެ ޖެނުއަރީ މަހުންފެށިގެން އޭޝިޔާއިން ޑެންގީ އާއި ގުޅޭ 92،000 އަށްވުރެ ގިނަ ކޭސްއެއް ރިޕޯޓްކޮށްފައިވާ ކަމަށްވެސް ޑަބްލިޔު.އެޗް.އޯއިން ވަނީ ބުނެފަ އެވެ.

ގްލޯބަލް ހެލްތްގެ އެއްބާރުލުމާއެކު މަދިރީގެ ޒަރިއްޔާއިން ފެތުރޭ ބަލިތައް ކަމަށްވާ ޑެންގީ، ޗިކުންގުންޔާ އަދި ޒިކާ ކޮންޓްރޯލް ކުރުމަށްޓަކައި، މަދިރި އާލާވާ ތަންތަނާއި ފިރިހެން މަދިރި ރޭޑިއޭޝަން ބޭނުންކޮށްގެން ސްޓެރިލައިޒް ކުރުމުގެ މަސައްކަތް ކުރަމުން އަންނަ ކަމަށްވެސް ޑަބްލިޔު.އެޗް.އޯގެ ޓްވީޓްގައި ވަނީ ބުނެފަ އެވެ. 

ޑަބްލިޔު.އެޗްއޯގެ ރިޕޯޓުތަކުން ހާމަވާގޮތުގައި ދުނިޔޭގައި ފެތުރޭ އެކި އިންފެކްޝަންތަކުގެ ތެރެއިން 17 އިންސައްތައަކީ ޑެންގީ، މެލޭރިޔާ، ޗިކުންގުންޔާ، ޒިކާ އަދި ޔެލޯ ފީވާރ ފަދަ މަދިރީގެ ޒަރިއްޔާއިން ފެތުރޭ އިންފެކްޝަންތަކެވެ. އަދި މި އިންފެކްޝަންތަކުގެ އަސަރު އަހަރެއްގެ މައްޗަށް ދުނިޔޭގެ އެކި ކަންކޮޅުތަކުން 700،000 މީހުންނަށް ކުރާކަމަށް ޑަބްލިޔު.އެޗް.އޯގެ ޓްވީޓްގައި ވަނީ ބުނެފަ އެވެ.

ގުޅުންހުރި ލިޔުންތައް

ފަހުގެ ލިޔުންތައް