އިންޑިއާގެ 13 ސްޓޭޓަކުން ދޫނި ރޯގާގެ ކޭސްތައް ފެނިފައި ވާ ކަމަށް، އެ ގައުމުގެ ސަރުކާރުން ހާމަކޮށްފި އެވެ.

އިންޑިއާގެ މިނިސްޓްރީ އޮފް ފިޝަރީޒް، އެނިމަލް ހަސްބަންޑްރީ އެންޑް ޑެއިރީއިންގްއިން މައުލޫމާތު ދޭ ގޮތުގައި، އޭވިއަން އިންފްލުއެންޒާ (ދޫނި ރޯގާ)ގެ ކޭސްތައް، 9 ސްޓޭޓަކުން ފެނުނީ ކެއުމަށް ބޭނުންކުރާ ދޫނިތަކުގެ އާބާދީއިންނެވެ. އަދި 12 ސްޓޭޓެއްގައި އުޅޭ ވަލުދޫނިތަކުން މި ބަލީގެ އަސަރު ފެނިފައި ވާ ކަމަށްވެސް މައުލޫމާތު ލިބެއެވެ.

އޭވިއަން އިންފްލުއެންޒާގެ ކޭސްތައް ފެނުނު ސްޓޭޓްތަކުގެ ތެރޭގައި ކެރަލާ، ހަރްޔާނާ، މަދްޔަ ޕްރަދޭޝް، މަހާރާޝްތުރާ، ޗައްތީޝްގަރު، އުއްތަރަހާންދު، ގުޖުރާތު، އުއްތަރަ ޕްރަދޭޝް އަދި ޕަންޖާބު ހިމެނެއެވެ. އަދި ވަލުދޫނިތަކުން ބަލީގެ އަސަރު ފެނުނު ސަރަހައްދުތަކުގެ ތެރޭގައި މަދްޔަ ޕްރަދޭޝް، ހަރްޔާނާ، މަހާރާޝްތުރާ، ޗައްތީޝްގަރު، ހިމާޝަލް ޕްރަދޭޝް، ގުޖުރާތު، އުއްތަރަ ޕްރަދޭޝް، އުއްތަރަހާންދު، ދިއްލީ، ރާޖަސްތާނު، ޖައްމުއާއި ކަޝްމީރު އަދި ޕަންޖާބު ހިމެނެއެވެ.

މި ސަރަހައްދުތަކަކީ، ކާޅާއި، ހިޖުރަ ކުރާ ދޫނިތަކުގެ އާބާދީއިންވެސް ދޫނި ރޯގާގެ އަސަރު ފެނިފައިވާ ސްޓޭޓްތަކެއް ކަމަށް އިންޑިއާގެ މިނިސްޓްރީ އޮފް ފިޝަރީޒް، އެނިމަލް ހަސްބަންޑްރީ އެންޑް ޑެއިރީއިންގްއިން މައުލޫމާތު ދެއެވެ.

ދޫނި ރޯގާ ނުވަތަ އޭވިއަން އިންފްލުއެންޒާއަކީ ދޫނިތަކާއި އިންސާނުންގެ ނޭވާލާ ނިޒާމަށް ޖެހޭ ބައްޔެކެވެ. މިއީ ވައިރަސް އަކުން ޖެހޭ ބައްޔެކެވެ. ދޫނި ރޯގާ ކިޔެނީ މިވައިރަސްގެ ސަބަބުން ޖެހޭ ރޯގާ ވަލު ދޫނި ތަކާއި، ހިޖުރަކުރާ ދޫނިތަކުގެ މެދުގައި އާންމުކަމުންނެވެ. މިބަލީގެ ޖަރާސީމު ބަލިޖެހިފައިވާ ދޫނީގެ ނަޖިހުގަޔާއި، ނޭވާލާ ނިޒާމުގައި ހުންނަ ދަވައިގަޔާއި، ލޭގައި ހުރެއެވެ.

ފަހުގެ ލިޔުންތައް