ރާއްޖެ އަށް އިންޑިއާ އިން ހަދިޔާކުރި 100،000 ޑޯޒް ކޮވިޝީލްޑް ވެކްސިން ބަހައްޓާފައި ހުރީ ރައްކާތެރިކަމާ އެކު ކަމަށް، އެޗްޕީއޭ އިން އިއްޔެ ބުނެފި އެވެ.

އެޗްޕީއޭ އިން ބުނީ އިންޑިއާ އިން ރާއްޖެ އަށް ހަދިޔާ ކޮށްފައިވާ ކޮވިޑް ވެކްސިން ބަހައްޓާފައިވަނީ ފިނިހޫނުމިން ހުންނަން ޖެހޭ މިންގަނޑުގައި ކަމަށެވެ. އަދި ރައްކާތެރިކޮށް މޮނީޓާ ކުރަމުން ދާ ކަމަށް ވެސް އެޗްޕީއޭ އިން ވަނީ ބުނެފައެވެ.

ވެކްސިނަކީ ވަކި ފިނިހޫނުމިނެއްގައި ރަނގަޅަށް ބަހައްޓަން ޖެހޭ އެއްޗެއް ކަމުން، މި ވަގުތު އެ ރައްކާކޮށްފައި ހުރީ ކޮން ގޮތަކަށްތޯ ބައެއް ނޫސްވެރިން ވަނީ އެޗްޕީއޭއާ ސުވާލުކޮށްފަ އެވެ. އަދި އޭގެ ޖަވާބުގައި އެޗްޕީއޭއިން ބުނީ ވެކްސިން ގުދަން ކުރެވިފައިވަނީ އެޗްޕީއޭގެ ކޯލްޑް ރޫމްގައި ކަމަށެވެ.

ކޮވިޝީލްޑް ބަހައްޓަން ޖެހެނީ 2-8 ޑިގްރީ ސެލްސިއަސްގެ ފިނިހޫނުމިނުގަ އެވެ.

ކޮވިޑް-19އާ ދެކޮޅަށް އަވަށްޓެރި އިންޑިއާއިން ކުރަމުން އަންނަ ހަނގުރާމައިގެ ތެރެއިން، އަވަށްޓެރި ގައުމުތަކަށް ވެކްސިން ހަދިޔާ ކުރުމަށް ހިންގާ މަޝްރޫއުގެ ދަށުން، އެ ގައުމުން އެންމެ ފުރަތަމަ ކޮވިޑް ވެކްސިން ފޯރުކޮށްދިން ގައުމަކީ ދިވެހިރާއްޖެއެވެ.

އިނގިރޭސިވިލާތުގެ އޮކްސްފޯޑް ޔުނިވަސިޓީ އާއި ބޭސް އުފައްދާ މައި އެއް ކުންފުނި ކަމަށްވާ އަސްޓްރަޒެނެކާއިން އުފެއްދި ކޮވިޝީލްޑްގެ 100،000 ޑޯޒުން 50،000 މީހުންނަށް ކޮވިޑުން ރައްކާތެރިކަން ހޯދައިދެވޭނެ އެވެ. އެއް ޑޯޒް ޖެހިޔަސް ކޮރޯނާވައިރަސްގެ ދިފާއު ހަށިގަނޑުގައި އުފެދެ އެވެ. އެކަމަކު ފުރަތަމަ ޑޯޒް ދޭތާ 4-12 ހަފުތާގެ ތެރޭގައި ދެވަނަ ޑޯޒެއް ޖެހުމުން އެ ދިފާއުގެ މިންވަރު 90 ޕަސެންޓަށް އަރާ ކަމަށް، ތަހުލީލުތަކުން ދައްކަ އެވެ.

ގުޅުންހުރި ލިޔުންތައް

ފަހުގެ ލިޔުންތައް