ރާއްޖޭގައި ކޮވިޑްގެ އާ ބާވަތް އުޅޭތޯ ބަލަން ސާމްޕަލް ފޮނުވަން މަޝްވަރާކުރަނީ
އިނގިރޭސިވިލާތުން ފެނުނު ކޮރޯނާވައިރަސްގެ އައު ބާވަތް ރާއްޖޭގައި އުޅޭތޯ ބެލުމަށް ސާމްޕަލް ބޭރަށް އަދި ނުފޮނުވާ ކަމަށާއި، ބޭރުގެ ލެބޯޓަރީތަކަށް ސާމްޕަލްތައް ފޮނުވުމާ ގުޅޭ ގޮތުން މިހާރު މަޝްވަރާކުރަމުންދާ ކަމުގައި ހެލްތު އެމަޖެންސީ އޮޕަރޭޝަން ސެންޓަރުން ބުނެފިއެވެ.
ރާއްޖޭގައި ކޮރޯނާވައިރަސްގެ އައު ބާވަތް އުޅޭކަން ދެނެގަތުމަށް ޓެސްޓު ހަދާނީ ރާއްޖޭގައި އުޅޭ ވައިރަސްގެ ސްޓްރެއިނުތައް ދެނެގަތުމަށް ޖެނެޓިކް ސީކުއެންސް ހެދުމުގެ ތެރެއިންނެވެ. ޖީން ސީކުއެންސް ހެދުމަށް މީގެ ކުރިން ސާމްޕަލްތަކެއް ފޮނުވައި ނަތީޖާވެސް ލިބިފައިވެއެވެ.
މިހާތަނަށް ރާއްޖެއިން ބޭރަށް ޖީން ސީކުއެންސް ހަދަން ފޮނުވީ ރާއްޖެއިން ފުރަތަމަ ޕޮޒިޓިވްވި ބޭރު މީހުންގެ ތެރެއިން ބައެއް މީހުންގެ ސާމްޕަލްތަކާއި މާލޭގައި ބަލި ފެތުރެން ފެށި ފުރަތަމަ ދުވަސްކޮޅު ބައްޔަށް ޕޮޒިޓިވްވި މީހުންގެ ސާމްޕަލްތަކެވެ.
އައު ވޭރިއެންޓު އުޅޭތޯ ބެލުމަށް ހަދާ ޓެސްޓަށް ވަކި ޚާއްޞަ ބައެއްގެ ކިބައިން ސާމްޕަލް ނަގާނެއެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)