ފައިޒާ އަދި ބަޔޯއެންޓެކް އިން އުފެއްދި ކޮވިޑް-19 ވެކްސިން ދޭ ފުރަތަމަ ޤައުމަކަށް އިނގިރޭސިވިލާތު ވެއްޖެ އެވެ.

ފައިޒާގެ މި ވެކްސިން ދިނުމަށްޓަކައި އިނގިރޭސިވިލާތުން ވަނީ ބޮޑު ކެމްޕެއިނެއް ވެސް ފަށާފައެވެ. އަދި ބްރިޓެއިންސް މެޑިސިން ރެގިއުލޭޓަރ އެއް ކަމަށްވާ އެމް.އެޗް.އާރް.އޭ އިން ވަނީ މި ވެކްސިން ޖަހައިގެން 95 އިންސައްތައަށް ބަލިން ރައްކާތެރިކޮށްދޭނެ ކަމަށް ބުނެފަ އެވެ.

ފައިޒާއިން ބުނިގޮތުގައި ކޮވިޑް-19 ވެކްސިންގެ ފުރަތަމަ ޑޯޒްތައް ވަނީ މިހާރު އިނގިރޭސިވިލާތަށް ދިއުމުގެ މަގުމަތީގަ އެވެ. ހަމައެހެން ކުރިއަށް އޮތް ދުވަސްތަކުގައި އިތުރު 800،000 ޑޯޒު ފޮނުވާނޭ ކަމަށް ފައިޒާއިން ވަނީ ބުނެފަ އެވެ.

ހަމައެހެންމެ އިނގިރޭސިވިލާތުގެ ހެލްތް ސެކްރެޓަރީ މެޓް ހެންކޮކް ވަނީ ޤައުމީ ސިއްހީ އިދަރާއިން ވެކްސިން ދޭ މީހުންނަށް މިހާރު ގުޅަމުންދާ ކަމަށް ބުނެފަ އެވެ. 

އިނގިރޭސިވިލާތުގައި ކޮވިޑް-19 ވެކްސިން ދޭ ލިސްޓްގެ އެންމެ ކުރީގައި ހިމަނާފައި ވަނީ ކެއާ ހޯމްތަކުގައި ދިރިއުޅޭ އުމުރުން ދުވަސްވީ މީހުންނާއި، އެ ތަންތަނުގެ މުވައްޒަފުންގެ އިތުރުން އެ ޤައުމުގައި ދިރިއުޅޭ އުމުރުން 80 އަހަރުން މަތީގެ ރައްޔިތުންނާއި، ސިއްހީ އެހީތެރިންނެވެ.

އެޤައުމުގެ ހޮސްޕިޓަލްތަކުގައި މިހާރުވަނީ -70 ޑިގްރީގައި ވެކްސިން ރައްކާކުރެވޭނެ އިންތިޒާމް ހަމަޖައްސާފަ އެވެ. އަދި އެއްވެސް ވެކްސިނެއް ބޭކާރުވެގެން ދިޔަ ނުދޭނެ ކަމަށް އުނގިރޭސިވިލާތުން ބުނެއެވެ.

ގުޅުންހުރި ލިޔުންތައް

ފަހުގެ ލިޔުންތައް