ޖަޕާނުގެ ރައްޔިތެެއް ކަމަށްވާ ކޮބަޔާޝީ އެންމެ ފުރަތަމަ އަމިއްލައަށް މަރުވުމަށް މަސައްކަތް ކޮށްފައިވަނީ އުމުރުން 22 އަހަރުގަ އެެވެ. ސަބަބަކަށްވީ ފުލްޓައިމް ވަޒީފާއެއް އަދާކުރަމުންވެސް ކޮބަޔާޝީއަށް އޭނާ ދިރިއުޅޭ ތަނުގެ ކުއްޔާއި، ބިލްތައް އަދި އެހެނިހެން ހަރަދުތައް ހަމަނުޖެއްސުމެވެ. 

“އަހަރެން އޭރު ވަރަށް ފަޤީރު” އަމިއްލައަށް މަރުވާން މަސައްކަތްކޮށް، ހޮސްޕިޓަލްގައި 3 ދުވަސް ވަންދެން ހޭނާރާ އޮތް  ކޮބަޔާޝީ ބުންޏެވެ. 

މިހާރު އުމުރުން 43 އަހަރުވެފައިވާ ކޮބަޔާޝީ އަކީ ނަފްސާނީ ބަލިތަކާއި ގުޅޭގޮތުން ފޮތެއް ލިޔެ އަދި އެންޖީއޯއެއްގައި ރަނގަޅު ވަޒީފާއެއް އަދާކުރަމުންދާ އަންހެނެކެވެ. އެހެންނަމަވެސް ކޮރޯނާވައިރަސް ޕެންޑަމިކް އަނެއްކާވެސް ކޮބަޔާޝީ ގެނެސް ވައްޓާލީ ކުރީގެ ނަފްސާނީ އަނދަވަޅަށެވެ.

“އަހަރެންގެ މުސާރަ ކުޑަކޮށްފި. މިހާރު އަހަންނަށް އެއްވެސް އަލިމަގެއް ފެންނަން ނެތް ކަހަލަ”. އޭނާ ބުންޏެވެ.

ކޮބަޔާޝީ ބުނިގޮތުގައި އޭނާއަށް މިހާރު އަބަދުވެސް އިހްސާސްވަނީ މި ދުވަސްވަރުގެ ސަބަބުން އަނެއްކާވެސް އަހަރެން ކުރީގެ ފަގީރުކަމަށް ރުޖޫއަވާން އުޅޭ ފަދަ އިހްސާސެ ކަމަށެވެ.

ސިއްހީ މާހިރުން މީގެ ކުރިންވެސް ވަނީ ކޮވިޑް-19 ޕެންޑަމިކްގެ ސަބަބުން ނަފްސާނީ މައްސަލަތައް އިންތިހާއަށް އިތުރު ވެދާނޭ ކަމުގެ އިންޒާރު ދީފައެވެ. ސަބަބަކީ ގިނަ ބައެއްގެ ވަޒީފާ ގެއްލުމާއި، އިޖްތިމާއީ ގައިދުރުކަން ބަހައްޓަން ޖެހުމުގެ ސަބަބުން އެންޒައިޓީ އާއި ކުރިމަތިލާންޖެހޭ މީހުންގެ އަދަދު އިތުރުވުމެވެ.

އެގޮތުން ޖަޕާނުގެ ތަފާސްހިސާބުތަކުން ދައްކާގޮތުގައި އެ ޤައުމުގައި ކޮވިޑް-19 ޖެހިގެން މަރުވި މީހުންގެ އަދަދަށްވުރެ، ހުސްވި އޮކްޓޫބަރު މަހު ތަފާތު ނަފްސާނީ މައްސަލަތަކުގައި އަމިއްލައަށް މަރުވި މީހުންގެ އަދަދު އިތުރެވެ. އޮކްޓޫބަރު މަހު އެކަނިވެސް އެޤައުމުން ވަނީ 2،153 މީހުން އަމިއްލައަށް މަރުވެފައެވެ. އެ ޤައުމުން ކޮވިޑު ޖެހިގެން މަރުވެފައި ވަނީ 2،087 މީހުންނެވެ.

ޖަޕާނުގެ ސަރުކާރުގެ ތަފާސް ހިސާބުތަކުން ދައްކާގޮތުަގައި އެ ޤައުމުގައި ގިނައިން އަމިއްލައަށް މަރުވަނީ އަންހެނުންނެވެ. އަދި ދުނިޔޭގެ ސިއްހީ ޖަމިއްޔާގެ 2016 ވަނަ އަހަރުގެ ތަފާސް ހިސާބުތަކުން ދައްކާގޮތުގައި ޖަޕާނުގެ ކޮންމެ އެއްލައްކަ މީހުންގެ ތެރެއިން 18.5 މީހުންނަކީ އަމިއްލއަށް މަރުވެފައިވާ މީހުންނެވެ. މި ލިސްޓުގެ ދެވަނާ ގައި އުޅެނީ ސައުތުކޮރެއާ އެވެ.

ޖަޕާނުން ގިނަ މީހުން އަމިއްލައަށް މަރުވުމަށް ދިމާވާ ސަބަބުތަކުގެ ތެރޭގައި ހިމެނެނީ ގިނައިރު މަސައްކަތް ކުރަން ޖެހުމާއި، ސްކޫލްގެ ޕްރެޝާ، ސޯޝަލް އައިސޮލޭޝަން، އަދި ޘަގާފީ ބައެއް މައްސަލަތަކެވެ. 

މިހާތަނަށް ހަދާފައިވާ ބައެއް ދިރާސާތަކުން ދައްކާގޮތުގައި ފިރިހެނުންނަށްވުރެ ނަފްސާނީ މައްސަލަތަކާއި ގުޅިގެން ރިޕޯޓުކުރާ އަންހެނުންގެ އަދަދު 27 އިންސައްތައަށް އިތުރެވެ.

ގުޅުންހުރި ލިޔުންތައް

ފަހުގެ ލިޔުންތައް