އެމެރިކާގެ މަސަޗޫސެޓްސް އިންސްޓިޓިއުޓް އެފް ޓެކްނޮލޮޖީގެ ރިސާޗަރުން ދާދިފަހުން އާންމުކުރި ރިޕޯޓަކުން، ކުެއްސުމުގެ  އަޑުންވެސް ކޮރޯނާވައިރަސް ހުރިކަން ދެނެގަނެވޭނެކަމަށް ބުނެފި އެވެ.

އާރޓިފިޝަލް އިންޓެލިޖެންސް (އޭ.އައި)ގެ އެހީގައި މި އިންސްޓިޓިއުޓްގެ ރިސާޗަރުންގެ ޓީމުވަނީ ކޮވިޑުގެ ކެއްސުން ދެނެގަނެފަ އެވެ. މިކަމަށްޓަކައި ރިސާޗަރުން އަޑުތައް އެއްކޮށްފައިވަނީ އެކި މީހުން ކެއްސަމުން ދިޔަ ވަގުތު ފޯނު ފަދަ އިލެކްޓްރިކް ވަސީލަތްތަކަށް ރެކޯޑު ކޮށްގެންނެވެ. 

މީގެ އިތުރުން ރެކޯޑިން ހޯދި ފަރާތްތަކުގެ ކިބައިން ޓީމުން ވަނީ ކެއްސުމުގެ އިތުރުން ދެން ފެންނަ ހުރި އަލާމާތްތައް އޮޅުންފިލުވާފަ އެވެ. އަދި ކޮވިޑަށް ޓެސްޓް ކޮށްފައިވޭތޯ ވެސް ވަނީ ޔަގީންކޮށްފަ އެވެ. 

މި ދިރާސާ ހެދުމަށްޓަކައި ޖުމްލަ 70،000 ކެއްސުމުގެ ރެކޯޑިން ވަނީ ލިބިފަ އެވެ. އަދި އޭގެ ދިރާސާ ޓީމުން ވަނީ 200،000 އެކި މީހުންގެ ކެއްސުމުގެ ސާމްޕަލް ނަގާފަ އެވެ. 

އެއަށްފަހު ސިސްޓަމް ބޭނުންކޮށްގެން ހެދި ތަހުލީލުތަކުން ދެއްކި ގޮތުގައި ކެއްސުމުގެ ސާމްޕަލްތަކުގެ ތެރެއިން 98.5 އިންސައްތަ ސާމްޕަލްސް ކޮވިޑަށް ޕޮޒިޓިވް އެވެ. އަދި މީގެތެރޭގައި އަލާމާތެއް ނެތި ކޮވިޑަށް ޕޮޒިޓިވްވި މީހުންވެސް ހިމެނެ އެވެ. 

ކޮވިޑުގެ ކެއްސުން ދެނެގަންނަ އާރޓިފިޝަލް އިންޓެލިޖެންސް މޮޑެލްސް އުފެއްދުމުގެ މަސައްކަތް ކުރަމުންދާއިރު، އެމްއައިޓީގެ ރިސާޗަރުންތަކެއް ދަނީ ކެއްސުމުގެ އަޑު ބޭނުންކޮށްގެން އަލްޒައިމާ ބަލި ހުރިކަން ދެނެގަންނާނެ އާރޓިފިޝަލް އިންޓެލިޖެންސް މޮޑެލްސް އުފެއްދުމުގެ މަސައްކަތް ކުރަމުންނެވެ.

ގުޅުންހުރި ލިޔުންތައް

ފަހުގެ ލިޔުންތައް