އަލަށް އުފަންވާ ތުއްތުކުދިންގެ ލޮލުން ފެން އައުމަކީ އާންމު ކަމެކެވެ. ރާއްޖޭގެ ނިސްބަތުން ބަލާނަމަ، 20 އިންސައްތަ ކުދިންނަށް މި މައްސަލަ ކުރިމަތިވެއެވެ. އަދި މިކަމަށް ހޭލުންތެރިވެފައި ނުވުމުގެ ސަބަބުން ބައެއް ބެލެނިވެރިންނަށް މިއީ ވަރަށް އާދައިގެ ކަމެއްގެ ގޮތަށް ހީވެ، ފަސޭހައިން އަޅާނުލާ ދޫކޮށްލެވެ އެވެ.
އައިޖީއެމްއެޗްގެ ކުޑަކުދިންގެ ހާއްސަ ޑޮކްޓަރ، ޑރ. އަހުމަދު ފައިސަލް ވިދާޅުވިގޮތުގައި ތުއްތު ކުދިންގެ ލޮލުން ފެން އައުމަށް އާންމުކޮށް މެދުވެރިވަނީ އުފަންވާއިރު ކަރުނަވަޅު އަދި ނޭފަތަށް އެފެންތައް ފައިބާ ހޮޅި ކުޑަވުން ހިމަވުމެެވެ.
މިއީ ކޮންމެ ތުއްތު ކުއްޖަކަށް ކުރިމަތިވާ މައްސަލައެއް ނޫނެވެ. އޭގެ ބަދަލުގައި ގިނައިން މި މައްސަލަ ކުރިމަތިވަނީ ދުވަސްނުފުރާ ކުދިންނަށެވެ. އެގޮތުން ދުވަސްނުފުރާ ވިހާ ކުދިންގެ ފެން އުފައްދާ މިންވަރު ނިސްބަތުން މަދުވި ނަމަވެސް، އޭގެ ދެ ހަފްތާ ފަހުން ފެން ފޭބުމަކީ އެކަށީގެންވާ ކަމެއްގެ ގޮތުގައި ޑރ. ފައިސަލް ވަނީ ފާހަގަކުރައްވާފަ އެވެ.
އުފަންވާއިރު ކަރުނަވަޅު އަދި ނޭފަތަށް އެފެންތައް ފައިބާ ހޮޅި ކުޑަވެ ނުވަތަ ހިމަވި ނަމަވެސް، ތުއްތުކުދިން ބޮޑުވާ ވަރަކަށް ހޮޅިވެސް ދާނީ ބޮޑުވަމުންނެވެ.
ޑރ. ފައިސަލް ވިދާޅުވީ މިހެން ފެންފައިބާ ނަމަ އަތްދޮވެގެން ނޭފަތަށް އެފެންތައް ފައިބާ ހޮޅި ކައިރިން ލޮލުގެ ބޭރުން މަސާޖުކުރެވިދާނެ ކަމަށެވެ.
އަދި މާގިނައިން ފެން ފައިބައި ، ލޮލުގެ ކަރުނަވަޅު ރަތްވެ ދޮސްލައި، ނުވަތަ އަހަރެއް ވާއިރު ރަނގަޅު ނުވާނަމަ، ޑޮކްޓަރަަށް ދެއްކުމަށް ޑރ. ފައިސަލް ވަނީ އިލްތިމާސް ކުރައްވާފަ އެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)