ރާއްޖޭގައި ކޮވިޑް-19އާއި ދެކޮޅަށް އިސްސަފުގައި މަސައްކަތްކުރާ ފަރާތްތަކާއި، އަދި އެމީހުން ދިރިއުޅޭ ގޭބިސީގައި އުޅޭ މީހުންގެ އިތުރުން ޑެލިވަރީގެ ހިދުމަތުގައި މަސައްކަތްކުރާ މީހުންގެ އެންޓިބޮޑީ ޓެސްޓް އޭޑީކޭގެ ފަރާތުން ހިލޭ ހަދައިދޭން ނިންމައިފި އެވެ.
އެންޓިބޮޑީސް ޓެސްޓު ހެދުމުގެ މި ހަރަކާތުގައި ޖުމްލަ 3000 ޓެސްޓު ހިލޭ ހަދައިދިނުމަށް ނިންމާފައިވާކަމަށް އޭޑީކޭއިން ވަނީ ބުނެފަ އެވެ. އަދި މި ޓެސްޓުތައް އެ ހޮސްޕިޓަލުން ހަދަން ނިންމާފައިވަނީ ރޯޗް ކޯބާސް އެލެކްސިސް E411 އިމިއުނޯ އެނަލައިޒަރ ބޭނުންކޮށްގެންނެވެ.
އޭޑީކޭއިން ބުނީ މި ޓެސްޓު ހެދުމަށް މަސައްކަތުގައި ބޭނުންކުރާނެ އުސޫލުތައް ކަނޑައަޅައި، ކަމަށް އެކުލަވައިލާ ތާވަލެއްގެ ދަށުން ކަމާބެހޭ ފަރާތްތަކާއި ގުޅިގެން އަންނަ ހަފްތާގައި ޓެސްޓުކުރަން ފެށުމަށް ނިންމާފައިވާ ކަމަށެވެ.
އޭޑީކޭ އިން ނެރުނު ނޫސް ބަޔާނުގައި އިތުރަށް ބުނެފައިވަނީ މިފަދަ ފަރާތްތަކުން އެންޓިބޮޑީ ޓެސްޓު ހަދައިދިނުމަށް އެދެމުން ދާކަމަށެވެ. އަދި މަސައްކަތުގެ މާހައުލުގައި މިފަރާތްތައް ބައްޔަށް ހުށަހެޅިފައިވުމަކީ ވަރަށް ކައިރީގައި އޮތް ކަމެއް ކަމުގައި ވެސް އޭޑީކޭ އިން ބުންޏެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)