އަރިދަފުސް ރޯގާއަށް ދިވެހިބޭސްވެރިންގެ ފަރުވާ
އަރިދަފުސް ރޯގާއަށް ފަރުވާ ދިނުމާ ބެހޭގޮތުން ދިވެހިބޭހުގެ މާހިރުން މައުލޫމާތު ދެއްވާފައިވެއެވެ. އެގޮތުން މައިގަނޑު ގޮތެއްގައި ބޭނުން ކުރެވެނީ 3 ބޭހެކެވެ. ކޮތަބިރިސަރުބަތު، މުއިކޮތަބިރި އަދި ވޭމުއިސަރުބަތު އެވެ. މިބޭސްތައް ތައްޔާރު ކުރާނެ ގޮތާއި، ބޭނުންވާ ތަކެއްޗާއި، ބޭނުންކުރަންވީ ގޮތް ތިރީގައި ބަޔާން ކުރެވިފައިވާނެއެވެ.
ކޮތަބިރިސަރުބަތު
ކޮތަބިރިސަރުބަތަކީ އަރިދަފުސް ރޯގާގެ އިތުރުން ބޯއެނބުރުމަށާއި، ހުން އައުމަށާއި، ގައި ކެހުމަށްވެސް ބޭނުން ކުރެވޭ ބޭހެކެވެ. އަދި މިބޭހަކީ ތައްޔާރުކުރުމަށްފަހު ކުރު މުއްދަތަކަށް ބެހެއްޓިދާނެ ބޭހެކެވެ.
ބޭނުންވާ ތަކެތި
10 ގްރާމް ކޮތަބިރި (ދޮވެ ސާފުކޮށްފައި).
6 ގްރާމް ކެލާފުށް.
600 މލ ވާރޭފެން.
300 ގްރާމް ހަކުރު.
ތައްޔާރު ކުރާނެ ގޮތް
- ކޮތަބިރި އަދި ކެލާ ފެނަށް އަޅާފައި އެއްރޭ ބަހައްޓާ
- ½ ހިދެންދެން ކައްކައި ފުރާނާލުމަށް ފަހު ބޮޑިގަޑު ފެލާލާ
- ހަކުރު އަޅައިގެން ބޮކި ޖަހާ ކެކެންދެން ކައްކާ
- ގަރުނެގުމަށްފަހު ފުރާނާލާ
ބޭނުންކުރަންވީ ގޮތް
6 ގަޑިން ނުވަތަ 4 ގަޑިން، 2 މޭޒުމަތީ ސަމުސާ ތިނެއް ނުވަތަ ފަސް ދުވަސް ވަންދެން ދޭށެވެ. ބޭހުގެ މިންވަރާއި ގަޑި މަދުކޮށްގެން އެއަށްވުރެ ދިގު މުއްދަތަކަށްވެސް ބޭނުން ކުރެވިދާނެއެވެ.
މުއިކޮތަބިރި
މުއިކޮތަބިރިއަކީ ހިތުގެ ބާރުގަދަ ކުރުމަށާއި، ހިތްހަމަޖެއްސުމަށް އަދި ބަނޑުގައި އުފެދޭ ފަނި ބޭރުކުރުމަށްވެސް ބޭނުން ކުރެވިދާނެ ބޭހެކެވެ. މިބޭސް ތައްޔާރު ކުރުމަށްފަހު ކުރު މުއްދަތަކަށް ބެހެއްޓޭނެއެވެ. އަދި ބޭނުންކުރުމުގެ ކުރިން ފުޅި ހަލުވާލާ އެއްކޮށްލަން ވާނެއެވެ.
ބޭނުންވާ ތަކެތި
8 ގްރާމް ކޮތަބިރި ފުށް
240 މލ މާމުއި
ތައްޔާރު ކުރާނެ ގޮތް
ކޮތަބިރި ފުށް ރަނގަޅަށް މާމުޔާ އެއްކުރާނީއެވެ.
ބޭނުންކުރަންވީ ގޮތް
3 އިރު އިރަކު 2 ސައިސަމުސާ މެދުނުކެޑި ދިހަ ދުވަސްވަންދެން ބޭނުން ކުރެވޭނެއެވެ. އަދި ބޭނުންވެއްޖެނަމަ އެއަށްވުރެ ދިގު މުއްދަތަކަށްވެސް ބޭނުން ކުރެވޭނެއެވެ.
ވޭމުއިސަރުބަތު
ހަމަގައިމުވެސް އެންމެ ގިނަ ބަޔަކަށް އެނގޭނޭ ދިވެހި ބޭސްތަކުގެ ތެރޭގައި ވޭމުއިސަރުބަތު ހިމެނޭނެއެވެ. މިބޭހަކީ ހުމަށާއި މޭގައި އަރިދަފުސް ހިފުމުގެ ސަބަބުން ދިމާވާ ކެއްސުމަށާއި ނޭވާ ދަތިވުމަށްވެސް ބޭނުން ކުރެވޭނެ ބޭހެކެވެ. އަދި މިބޭސް ތައްޔާރުކުރުމަށްފަހު ބެހެއްޓޭނީ ކުރު މުއްދަތަކަށެވެ.
ބޭނުންވާ ތަކެތި
10 ގްރާމް ވޭމުއި
10 ގްރާމް ހިކިއިގުރު
10 ގްރާމް ނަބާޒު ހަކުރު
5 ގްރާމް ކޮލިޒާން
5 ގްރާމް ވަކިފޫ
3 ގްރާމް ކަރަންފޫ
900 މލ ވާރޭފެން
450 ގްރާމް ހަކުރު
ތައްޔާރުކުރާނެ ގޮތް
- ވޭމުއި، އިގުރު އަދި ކޮލިޒާން ކުދިކޮށް ކޮށާލާ
- ނަބާޒު ހަކުރު ފިޔަވައި އެހެން ހުރިހާ ބޭސްތައް މުގުރާލާ
- ހުރިހާ ބޭސްތައް ފެނަށް އަޅައިގެން 3/1 ހިދެންދެން ކައްކާ
- ފުރާނައިފައި ބޮޑިގަޑު ފެލާލާ
- ހަކުރު އަޅާ ކެއްކުމަށްފަހު ބޮކިޖަހާ ކެކެން ފެށުމުން 3 މިނެޓް ކައްކާ
- ގަރުނެގުމަށްފަހު ބާލާ
ބޭނުންކުރަންވީ ގޮތް
3 އިރު ނުވަތަ 4 އިރު އިރަކު 2 ސައިސަމުސާ ފަސް ދުވަހާއި ދިހަ ދުވަހާއި ދެމެދުގެ މުއްދަތަކަށް
މައުލޫމާތު ނަގައިފައިވަނީ އަޙްމަދު ޞާލިޙް ޙުސެއިން ލިޔުއްވި 'ދިވެހި ބޭސްވެރިންގެ އަތްމަތީ ފޮތް' މިފޮތުންނެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)